Fisioconsolas

Para o desenvolvemento deste proxecto realizáronse dous tipos de adaptacións principais. En primeiro lugar, efectuáronse modificacións dentro do propio software da consola Nintendo Switch, activando determinadas opcións que permiten optimizar a experiencia de xogo e mellorar a accesibilidade para diferentes usuarios. En segundo lugar, leváronse a cabo adaptacións físicas mediante impresión 3D, deseñadas para facilitar o uso dos mandos da consola e garantir unha manipulación máis cómoda, ergonómica e inclusiva.

1. No videoxogo Mario Kart 8 Deluxe realizáronse diversas adaptacións co obxectivo de mellorar a accesibilidade e facilitar a participación das persoas usuarias. Elimináronse os obxectos do xogo, activouse a axuda ao guiado para evitar saír da pista e configurouse a aceleración automática. Ademais, levouse a cabo unha avaliación dos diferentes circuítos, elaborando unha listaxe daqueles máis e menos accesibles, en función da súa dificultade e das características de xogo que presentan.
2. No ámbito das impresións 3D, desenvolvéronse varias adaptacións personalizadas: unha para controlar o mando da Nintendo Switch dende a cadeira, suxeitándoo arredor do corpo, e outra consistente nun casco adaptado que permite enganchar o mando para manexalo coa cabeza. Actualmente estanse a deseñar novas solucións orientadas ao adestramento e mellora do equilibrio, continuando así o labor de innovación e accesibilidade dentro do proxecto.