Configuración personalizada de asistentes de voz en distintas estancias dos CAPD para facilitar a autonomía dos usuarios. Os asistentes de voz ofrecen unha serie de beneficios significativos para as persoas con discapacidade intelectual. Estes asistentes proporcionan unha interface accesible que non require de habilidades avanzadas de lectura, escritura ou comprensión. Algunhas das posibilidades son establecer recordatorios, crear listas de tarefas, programar citas, lembrar a toma de medicamentos, escoitar un resumo das noticias do día ou acender unha lámpada remotamente. Estas funcionalidades permiten compensar posibles dificultades cognitivas na memoria e a organización, acceder a información relevante e actualizada e mellorar a autonomía das persoas con discapacidade. Para a súa implementación, tivéronse en conta as necesidades dos usuarios e profesionais, garantindo que os comandos e funcións sexan accesibles e útiles.
