Compra con-Migo é unha aplicación terapéutica que simula a experiencia de facer a compra nun supermercado, utilizando tecnoloxía NFC/RFID. O usuario debe seleccionar produtos dun banco de obxectos, pasalos por un lector e introducilos nunha cesta virtual. O obxectivo é mellorar a autonomía das persoas con discapacidade intelectual nas actividades da vida diaria, favorecendo a toma de decisións, a planificación e a xestión do diñeiro en situacións reais.
A selección dos produtos e a interface do xogo foron deseñadas tendo en conta as solicitudes dos profesionais e usuarios, incorporando pictogramas, etiquetas con cores diferenciadas e opcións de lectura fácil para facilitar a comprensión. Ademais, configuráronse opcións de accesibilidade para permitir un uso adaptado ás capacidades motoras e cognitivas de cada participante.
