A implementación da impresión 3D nos CAPD ofrece novas posibilidades na creación de produtos de apoio personalizados, materiais educativos adaptados e dispositivos lúdicos accesibles. A formación no uso destas impresoras permite que tanto os profesionais como os propios usuarios poidan deseñar e materializar solucións específicas ás súas necesidades.
Os deseños impresos foron seleccionados e adaptados tendo en conta as solicitudes dos profesionais e usuarios, priorizando a creación de ferramentas que melloren a autonomía, a accesibilidade e a participación nas actividades cotiás. Tamén se consideraron aspectos de usabilidade, como superficies táctiles diferenciadas, etiquetas en braille e pezas ergonómicas para facilitar o manexo.
