Pantallas dixitais interactivas

O proxecto de pantallas dixitais interactivas busca mellorar a aprendizaxe e a estimulación de habilidades cognitivas e sociais mediante tecnoloxía adaptada. Cada centro conta con dispositivos seleccionados e configurados para ofrecer unha experiencia accesible, intuitiva e motivadora para todos os usuarios. Podemos dividir este subproxecto en dous apartados

O primeiro apartado céntrase na elección e adaptación do equipamento. Optouse polas pantallas Smart Board GX165-v3 de 65 polgadas para garantir unha calidade de imaxe óptima e unha interacción táctil fluída. Para favorecer a accesibilidade e a comodidade de uso, instaláronse soportes motorizados que permiten axustar a altura das pantallas segundo as necesidades dos usuarios. Nos centros que xa contaban con pantallas, incorporouse un módulo OPS para ampliar as capacidades do dispositivo e mellorar a súa interface, facendo que fose máis intuitiva e sinxela de utilizar para profesionais e usuarios.

No segundo apartado centrámonos na selección de contidos dixitais. Cada xogo e aplicación foi analizada individualmente polo equipo terapéutico, tendo en conta as súas características accesibles e o potencial para desenvolver habilidades cognitivas e sociais. Esta revisión permitiu seleccionar experiencias que non só son motivadoras e interactivas, senón tamén adaptadas ás capacidades dos usuarios, garantindo que cada actividade contribuíse ao desenvolvemento integral e á inclusión dentro dos centros.