Robots de acompañamiento

A arquitectura do sistema baséase na integración entre o robot Robobo e unha tableta con sistema operativo Android ou iPadOS, facendo uso de dúas aplicacións, unha que descargarase no móvil que controlará o robot, Robobo Cares, e outra, chamada Robobo Cares – Remote, que se descargará na tablet dende a que se mandarán as ordes ao robot. A tableta actúa como centro de control e permite configurar, iniciar e xestionar as distintas actividades dispoñibles. A conexión entre ambos dispositivos é directa e automática, sen necesidade de realizar configuracións manuais antes de cada sesión.  Cada actividade conta cun botón de inicio e outro de parada, o que permite poñer o robot en estado de repouso en calquera momento. Ademais, algunhas actividades dispoñen de parámetros personalizables que permiten adaptar a experiencia segundo as características e necesidades de cada usuario.

Un elemento esencial do sistema é o recoñecemento mediante códigos QR. Cada persoa usuaria do centro dispón dun código que inclúe o seu identificador e o seu nome completo. Robobo é capaz de ler estes códigos e empregar o nome de pila para realizar interaccións máis persoais e naturais. Este mecanismo tamén facilita a xestión das actividades e a personalización das respostas, e acompáñase dunha guía ou infografía que explica o proceso de creación e asignación dos códigos a cada participante.

As actividades propostas dentro da plataforma Robobo son as seguintes: 

• Saúdo por QR: Robobo identifica ao usuario mediante o seu código QR e saúdao polo nome, engadindo unha frase motivacional escollida aleatoriamente dun banco de mensaxes para evitar repeticións. O obxectivo é iniciar a interacción de forma personalizada e positiva.

• Agenda por QR: O robot comunica información relevante para o usuario, como citas médicas, actividades do centro ou visitas familiares. Esta función require conexión con bases de datos externas ou APIs, permitindo ofrecer mensaxes automáticas e personalizadas.

• Acompañamento en actividades: Robobo actúa como apoio motivacional durante as tarefas e talleres do centro. Pode emitir mensaxes orais e visuais de saúdo, felicitación, reforzo, erro ou finalización da actividade. Estas mensaxes combinan voz, expresión facial e movementos sincronizados, e o profesional pode empregar modelos prefabricados ou crear mensaxes novas adaptadas á situación.

• Conversación: O robot intégrase cun chatbot que permite manter diálogos sinxelos co usuario. Inicia a conversa cun saúdo e responde ás preguntas ou comentarios de maneira natural. Esta actividade fomenta as habilidades comunicativas e sociais, reforzando a confianza do participante.

• Cores: Robobo solicita ao usuario que lle mostre obxectos de diferentes cores e reacciona segundo o acerto ou erro, empregando mensaxes positivas, caras animadas e movementos suaves. A actividade traballa a atención e o recoñecemento visual.

• Motricidade: Esta actividade céntrase na práctica psicomotriz e divídese en dúas modalidades:

  • Calentamento: Robobo guía ao usuario en movementos básicos (levantar brazos, xirar o tronco, inclinarse) con apoio visual e expresivo.

  • Xogo: O robot propón instrucións máis dinámicas e de diferente dificultade, que o usuario debe seguir (“manos á cabeza”, “tócate o nariz”, etc.). Esta modalidade mellora a coordinación, o equilibrio e a lateralidade.