Dotación e configuración de videoconsolas para o seu uso terapéutico nos CAPD, seleccionando xogos adaptados que fomenten o desenvolvemento de habilidades cognitivas, motoras e sociais. As videoconsolas integradas no proxecto inclúen a Nintendo Switch e a PlayStation 3, aproveitando características específicas de accesibilidade como os mandos Move e a cámara de detección de movemento para crear experiencias interactivas adaptadas ás necesidades dos usuarios.
A selección de xogos foi realizada tendo en conta as recomendacións dos profesionais e as preferencias dos usuarios, priorizando aqueles que promoven a coordinación, a planificación, a toma de decisións e o exercicio físico. Ademais, configuráronse as videoconsolas con opcións de accesibilidade para facilitar o seu uso, como axustes de control simplificados, pictogramas explicativos e modos de xogo adaptados.
A inclusión de xogos con sensores de movemento permite que os usuarios poidan participar de forma activa, incluso aqueles con limitacións motoras, garantindo unha experiencia accesible e motivadora dentro das sesións terapéuticas e de ocio.
O uso de impresión 3D permitiu a creación de adaptacións para mandos de videoxogos, facilitando a accesibilidade a persoas con dificultades motoras. Un exemplo é o desenvolvemento dun controlador personalizado para a Nintendo Switch, que permite manexar xogos mediante movementos do tronco ou da cabeza.
